Nang Yumakap ang Pasko

 Akda ni Richard Policarpio

Simoy ng mabangong hangin na sadyang kaylamig

Tumatagos sa pusong titibok-tibok at pipintig-pintig

Hatid ay pagpapala sa taong may tapat na dalangin

Na sa kanyang puso ay kabutihan ang sumasalamin.

Sa likod ng bundok makikitang nakakubli

Ang papasikat at kaakit-akit na liwanag ay nariyan nang muli

Binabadya'y malaking galak sa taong bukas ang kamay

Sa kapwa ay tugon ang lubos na pagdamay.

Araw ng Pasko’y nalalapit na

Sa pista ng mundo, ang mga tahanan ay sagana.

Bawat puso ay muling mahahagkan

Yayakapin ng madlang ligayang di mapapantayan

Ang banal at ang makasalanan ay muling napag-ugnay

Pinuspos ng pagpapala sa pag-ibig na tunay.

Nang ang Hari na sa krus nabayubay,

Bigyan ng diwa ang pagmamahal na kanyang inalay.

(c) Richard Policarpio, Oktubre 20, 2010.